top of page
Search
  • Writer's picturetopedukator

Атлетско стапало – чест и сериозен проблем кај физички активната популација


Што е т.н. Атлетско стапало и зошто се појавува?

Знаете ли дека дури до 70 % од населението може страда од атлетско стапало во одреден период од животот?

Атлетско стапало е инфекција која најчесто се јавува на кожата на стапалото помеѓу прстите, но може да се прошири и на другите делови на стапалото и ноктите. Оваа болест името го добила бидејќи најчесто се јавува кај спортисти кои поголем дел од денот го поминуваат во спортски обувки и ногата обилно им се поти, па настануваат најчесто  габични инфекции кои најдобро се развиваат во влажни услови. На ова може да се надоврзат и бактериски инфекции. Постојат различни габи кои предизвикуваат атлетско стапало, и тие може да се најдат на повеќе локации, вклучувајки ги и спортските сали, соблекувални, базени, салоните за нокти, како и во контаминирана облека и чорапи. Габите, исто така, може да се пренесуваат директно од човек на човек преку контакт обично доколку одиме боси по влажен под. Заразувањето се случува и доколку вашите обувки ги носи човек кој ја има инфекцијата или доколку употребувате инфицирани предмети за лична хигиена.

 

Симптоми на габична инфекција на стапалата:

·        Црвена, испукана, воспалена кожа а во потешки случаи кожата може и да крвари.

·        Чешање и пецкање.

·        Појава на мали меурчиња кои пукаат по што кожата станува чувствителна и воспалена, а местото е болно.

·        Промена на бојата на ноктите (жолта или сива) и задебелување на ноктите.

·        Непријатен мирис од стапалата.

 

Како да се заштитиме од габичните инфекции на стапалата?

Клучно е водење на добра хигиена на стапалата и еднаш во текот на денот миење со топла вода и сапун. По миењето потребно е стапалата добро да се исушат. Менувајте ги чорапите редовно особено доколку се испотени. Не одете боси а ако сте во можност почесто соблекувајте ги обувките и седете по чорапи. Секогаш кога сте во можност и кога дозволуваат временските услови носете отворени обувки кои овозможуваат стапалото да може да дише, со што ќе ја намалите можноста од габична инфекција. Доколку вашата нога обилно се поти, чевлите кои сте ги носеле во текот на денот, оставете ги да се проветрат пред повторно користење.

Третманот на габичните инфекции на стапалото знае да биде долг и тежок процес заради што превенцијата е многу важна. Процесот на лечење најчесто подразбира употреба на антимикотични креми, а доколку лекувањето со нив не дава задоволителни резултати понекогаш се користат лекарства за внатрешна употреба. 

0 views0 comments

コメント


bottom of page