top of page
Search
  • Writer's picturetopedukator

Како да избереме најсоодветни капки за нашето добро очно здравје?

Зошто доаѓа до симптоми на нелагодност на очите?

Современиот начин на живот, честопати вклучува долга работа пред компјутер, посета на спа центри, изложување на вештачки извори на светлина или работа во слаба светлина, носење контактни леќи, користење на клима уреди и други активности кои ја зголемуваат можноста за појава на проблеми со очите. Причина за иритација на очите може да бидат и ниски температури, директна сончева светлина, силен ветер или прашина, иритација од производи за чистење, козметика за лице, сапуни, шампони или пливање во хлорирана вода во базен. На очното здравје негативно влијаат и нашите лоши животни навики како што се пушењето, конзумацијата на алкохол, недостаток на сон, како и недоволен внес на витамините А, Б, Ц, Е и каротеноиди со исхраната. На крајот не треба да ги заборавиме и алергиските реакции најчесто предизвикани од полен, прашина, мувла, и влакна од домашни миленици или бактериски инфекции од кои најчест е конјуктивитисот.Симптомите на нелагодност најчесто вклучуваат чувство на сувост, пецкање, чувство на песок или туѓо тело во очите, црвенило, оток, главоболка, чувствителност на светлина и др.

Како да си помогнеме при симптоми на нелагодност на очите?Одредени активности може значајно да ни помогнат да се намалат симптомите на иритација и сувост во нашите очи а пред се:

·        Добра хигиена на лицето и очите,

·        Правилно и хигиенско користење на контактните леќи,

·        Почесто трепкање при работа на компјутер и други електронски уреди,

·        Намалена изложеност на клима-уреди,

·        Носење заштитни очила за сонце кога сме надвор,

·        Носење на заштитни очила при пливање,

·        Избегнување на присуство во зачадени простории,

·        Умерена консумација на алкохол и добар сон,

·        Користење на додатоци во исхраната на база на лутеин и зеаксантин,

·        Ладни облоги или облоги со камилица или зелен чај.

Покрај овие превентивни мерки, освен во случаи на докажана алергија или бактериски инфекции, корисни може да бидат и стерилни капки за очи на природна база кои се без конзерванси. Постојат повеќе видови на капки за очи: капки против црвенило, капки за сувост, капки против алергија итн. Важно е да се користат според дадените упатства и речиси во сите случаи, освен ако не е јасно наведено поинаку, треба да се извадат контактните леќи пред да се стават капки во очите. Потоа, треба да се почека минимум 15 минути пред да се вратат контактните леќи.

 

Како да избереме најсоодветни капки за нашето добро очно здравје?

Пациентите се во вечна потрага по идеални капки за очи кои ќе ги ослободат од гореспоменатите непријатни симптоми. Како доста корисни се покажале природни препарати кои содржат: розмаринска киселина, алантоин, хијалуронска киселина, витамин Б12, камилица, боровница и др.

Розмаринската киселина е полифенол со силни антиоксидантни и антиинфламаторни својства кои се особено корисни во случај на алергиски реакции. Дејствува против слободните радикали и затоа го штити очното ткиво од ефектите на оксидативниот стрес на кој окото е секојдневно изложено.

Алантоинот е природно соединение кое ја намалува иритацијата и има заштитно дејство со формирање на комплекси со супстанции кои предизвикуваат хиперсензитивност и зголемување на количината на вода во екстрацелуларната супстанција. Благодарение на неговите навлажнувачки својства, алантоинот придонесува и за поправка на ткивото и во исто време го стимулира формирањето на клетките како физиолошки одговор на повреда.

Витаминот Б12 е суштинска хранлива материја која човечкото тело не може да ја синтетизира. Има антиоксидантни својства против слободните радикали и помага да се создаде соодветна екстрацелуларна микросредина на површината на окото за нормален раст и обновување на очниот епител.

Хијалуронската киселина е високо биокомпатибилен полисахарид кој природно постои во сите ткива. Поради својата вискоеластичност и способност за хидратација, хијалуронската киселина придонесува за подобро подмачкување на капките, а со тоа го олеснува лизгањето на очните капаци и го намалува триењето на површината на рожницата и конјуктивата, со што се намалува чувството на суви очи.

Камилицата помага кај иритираните, црвени и уморни очи благодарение на природните антиинфламаторни својства.

Боровницата содржи флавоноиди со силна антиоксидантна активност. Придонесува за здрава функција на очите преку антиоксидантни, антиинфламаторни, вазопротективни својства и стабилизација на колаген.

Доколку сепак и покрај горе-преземените мерки не успееме да ги отстраниме симптомите на непријатност во очите треба да се консултираме со офталмолог со цел  да се утврди причината што ги предизвикува овие проблеми и да се добие соодветна фармаколошка терапија.

 

2 views0 comments

Comments


bottom of page